ඉස්ලාමීය රාජ්‍යයේ දෙවෙනි කලීෆා වරයා වුනේ උමර් ඉබ්න් අල්-කත්තාබ්. ඔහු ඉස්ලාමීය ඉතිහාසයේ සුවිශේෂී චරිතයක්, වගේම මුහම්මද් තුමාගේ ළඟම සහචරයෙක් සහ එතුමාගේ අනුප්‍රාප්තිකයෙක්.
උමර් ගේ අගනුවර වුනේ අරාබියේ මදීනා නගරය. හවසට නගරයේ ඇවිදින එක ඔහුගේ පුරුද්දක් වෙලා තිබුනා. මෙහෙම ඇවිදපු එක සවසක ඔහුට මහන්සි දැනිලා වීදියේ කොණක තිබුන පරණ බැම්මකට පිට දීලා ඉඳගත්තේ මහන්සි අරින්න.
ඒ බැම්ම එහා පැත්තෙ තිබුනේ කුඩා ගෙදරක්. එහි වාසය කළේ දුප්පත් කාන්තාවක් සහ ඇගේ තරුණ දුව. ඔවුන් ජීවත් වුනේ කිරි විකුණලා. උමර් මේ කිසි දෙයක් දැනගෙන හිටියේ නෑ. ඒත් බැම්මට හේත්තු වෙලා හිටපු ඔහුට බැම්මෙන් එහා පැත්තෙ කෙරෙන සංවාදය ඇහුනා.
කිරි වෙළන්දිය සහ දුව පහුවදා විකුණන කිරි සකස් කරමින් හිටියේ. කිරි වලට වතුර එක් කරන ලෙස වෙළෙන්දිය දුවට කිව්වා. එතකොට ඔවුන්ට වැඩිපුර කීයක් හරි හොයා ගන්න පුළුවන්. ඒත් දුව ඒක ප්‍රතික්ෂේප කලා.
"අපේ නායකයා උමර් අපිට අණ කරලා තියෙනවා නේද විකුණන කිරි වලට වතුර එක් කරන්න එපා කියලා?"
"උමර්ට අපිව පේන්නෙ නෑ නෙ, පැහිච්චකම් නැතුව ඕකට වතුර දාපන්"
"අම්මේ, උමර්ට අපිව පේන්නෙ නෑ තමයි, ඒත් දෙවියන්ට අපිව පේනවා"
උමර් මද සිනා පාලා හිස සැලුවා. ඔහු තමාගේ සේවකයාට කිව්වා බැම්මේ හුණු කෑල්ලකින් සලකුණක් තියන්න.
පහුවදා උමර් තමාගේ පුතුන් කැඳවලා සිදුවීම විස්තර කළා.
"නුඹලාගෙන් කවුද කැමති මේ තරුණිය විවාහ කරගන්න?"
උමර්වත්, ඔහුගේ පුතුන්වත් මේ තරුණිය ලස්සනද කැතද, උසද මිටිද, කළුද සුදුද කියල වත් දැකල තිබුනේ නෑ. ඒත් උමර් ගේ තරුණ අවිවාහක පුතෙක් වුනු අසීම් එක පයින් ඇයව විවාහ කරගන්න කැමති වුනා.
උමර් සේවකයෙක් එක්ක ඔටුවෙක් යැව්වා කිරි වෙළෙන්දිය සහ තරුණිය තමා වෙත කැඳවාගෙන එන්න. ඔවුන් උමර් ගේ නිවසට ආවේ බියෙන් ගැහෙමින්. උමර් කිරි වෙළෙන්දියට තමාගේ පුතා ඇගේ දියණිය විවාහ කරගන්න කැමති බව කියා සිටියා. ඔවුන්ට අදහා ගන්න බෑ. විවාහය සිදු වුනා.
ඉතිහාසයේ මේ තරුණිය ගේ නම සඳහන් වෙන්නේ නෑ. ඒත් අසීම්ට සහ ඇයට ලැබෙන දියණිය ගැන සඳහන් වෙනවා. ඇගේ නම ලයිලා. ලයිලා විවාහ වෙන්නේ බලවත් සහ වංශවත් පවුලක තරුණයෙක් එක්ක. ඔහුගේ නම අබ්දුල් අසීස්.
පසු කාලෙක අබ්දුල් අසීස් ගේ පවුල වුනු උමයියා වංශය ඉස්ලාමීය රාජ්‍යයේ කලීෆා තනතුර හිමි කර ගන්නවා. අබ්දුල් අසීස් ගේ සොහොයුරා සහ සොහොයුරාගේ පුතා වුන සුලෙයිමාන් කලීෆා තනතුරට පත් වෙනවා. අබ්දුල් අසීස් ඊජිප්තුවේ ආණ්ඩුකාර තනතුර ලබනවා. මේ වන විට ඉස්ලාමීය රාජ්‍යය තමයි මුළු ලෝකයේම තිබුන බලවත්ම සහ ධනවත්ම රාජ්‍යය.
අබ්දුල් අසීස් ට සහ ලයිලා ට පුතෙක් ලැබෙනවා. ඔවුන් උමර් ඉබ්න් අල්-කත්තාබ් සිහි වෙන්න ඔහුට උමර් කියලා නම තියනවා. උමර් බුද්ධිමත් බව සහ ආගමික භක්තිය නිසා ඉමහත් ප්‍රසිද්ධියක් ලබනවා.
මේ කාලයේ කලීෆා තනතුර දැරූ සුලෙයිමාන් රෝගාතුර වෙලා මිය යන්න ලෙඩ ඇඳේ ඉද්දි ඔහුගේ පුරෝහිතයන් ඔහුගෙන් පසු කලීෆා තනතුර හිමි වෙන්නේ කාටද කියා අහනවා. සුලෙයිමාන් ට පුතුන් රැසක් හිටියත්, ඔහු තමාගේ අනුප්‍රාප්තිකයා ලෙස තෝරා ගන්නේ උමර්.
දුප්පත් කිරි වෙළෙන්දියගේ මුණුපුරා ලෝකයේ බලවත්ම රාජ්‍යයේ පාලකයා වෙන්නේ එහෙමයි.
No comments:
Post a Comment