අලී ඉබ්න් අබු තාලිබ් කියන්නේ මුහම්මද් තුමාගේ සමීපම අනුගාමිකයෙක්, එතුමාගේ දියණිය වුණු ෆාතිමාගේ සැමියා සහ ඉස්ලාමීය රාජ්‍යයේ හතරවෙනි කලීෆා වරයා.
අලී කලීෆා ධූරය දරන දවස් වල දවසක් ඔහු හමුවෙන්න ඔහුගේ මිතුරන් දෙදෙනෙක් ආවා. ඔවුන් ආවේ පුද්ගලික කටයුත්තක් ගැන කතා කරන්න.
ඔවුන් අලී ගේ නිවසට එද්දී රෑ බෝවෙලා. අලී ඉටිපන්දමක එළියෙන් ලියකියවිලි වල වැඩක් කරමින් හිටියා. මිතුරන් දෙදෙනා දුටු අලී ඔවුන්ව පිළිගෙන ඔවුන්ට ඉඳ ගන්න අසුනක් දීලා ඔවුන් ආපු කාරණාව විමසා සිටියා.
ඔවුන් ආවේ පුද්ගලික කටයුත්තකට කියල දැනගත් වහාම අලී අත ඔසවලා ඔවුන්ව නතර කළා. ඊට පස්සේ මේසය උඩ දැල්වෙමින් තිබුණු ඉටිපන්දම නිවලා ළඟ තිබුණු පෙට්ටියක් ඇතුළෙන් වෙනත් ඉටිපන්දමක් අරගෙන ඒක පත්තු කරලා මේසය උඩ තිබ්බා.
"ඔබ කරගෙන ආපු කතාව කියන්න"
අලී මිතුරන්ට අතින් සන් කරමින් කිව්වා.
මිතුරන් දෙදෙනා වික්ෂිප්ත වෙලා අලී දිහා බලාගෙන හිටියා.
"මොකද්ද ඔබ ඒ කරේ?"
ඔවුන් ඇහුවා.
"කලින් තිබුණු ඉටිපන්දම භාණ්ඩාගාරයේ මුදලින් ගත්ත එකක්. මේ ඉටිපන්දම මගේ පුද්ගලික මුදලින් ගත්ත එකක්. මගේ පුද්ගලික වැඩකට භාණ්ඩාගාරයේ මුදලින් ගත්ත ඉටිපන්දමක් වැය කරන්නේ කොහොමද?"
=====================================
අලී ගේ වැඩිමල් සොහොයුරාගේ නම අකීල්. අකීල් ජීවිතයේ අවසාන කාලයේ අන්ධ බවට පත් වෙලා හිටියා. ජීවිකාව කරගෙන යන්න නොහැකි වීම නිසා ඔහු ජීවත් වුනේ අපහසුවෙන්.
"ඔබේ මල්ලි අලී කලීෆා වරයා නේද? ඇයි ඔබ මේ වගේ දුක් විඳින්නේ? මල්ලිට කියලා මුදලක් ඉල්ලාගෙන පහසුවෙන් ජීවත් වෙන්න පුළුවන් නේ?"
අකීල් ගේ අසල්වැසියන් ඔහුට කිව්වා. ඒ නිසා අකීල් දවසක් ඔහු ජීවත් වුන මදීනා නගරයේ ඉඳන් අලී හිටිය ඉරාකයේ කූෆා නගරයට පිටත් වුනේ අලී ගෙන් අධාරයක් බලාපොරොත්තුවෙන්.
සති කිහිපයක දුෂ්කර ගමනකට පසු අකීල් කූෆා නගරයට ඇවිත් අලී හමු වුනා. අලී ඔහුව සාදරයෙන් පිළිගෙන ආපු කාරනාව විමසා සිටියා. අකීල් ඔහුගෙන් මුදල් ආධාරයක් ඉල්ලුවා. අලී කලීෆා වරයා වුනත් ඔහු ජීවත් වුනේ කලීෆා වෙන්න කලින් ගත කළ සුපුරුදු විදිහටමයි. ඒ නිසා ඔහු ළඟ ගොඩක් මුදල් තිබුනේ නෑ. ඔහු ඒ බව අකීල් ට කිව්වම භාණ්ඩාගාරයෙන් මුදල් ටිකක් අරන් දෙන්න කියලා අකීල් යෝජනා කළා.
"මට ඔබේ අත දෙන්න"
අලී කිව්වා. අකීල් ඔහුගේ අත අලීට දිගු කලා. අන්ධයෙක් නිසා අකීල්ට අලී කරන දේ පෙනුනේ නෑ. එක වරම අකීල්ට තියුණු වේදනාවක් දැනුනා. ඔහු වේදනාවෙන් කෑ ගහලා අත ඇදලා ගත්තා.
අලී ඔහුගේ අත අරගෙන මේසය මත තිබුණු ඉටිපන්දමේ දැල්ලට අල්ලලා.
"ඔබ මොනවද මේ කරන්නේ? මගේ අත පිච්චුනා"
අකීල් කෝපයෙන් ඇහුවා.
"අකීල්, මගේ සොයුර, මේ ඉටිපන්දමේ පුංචි දැල්ලෙන් පිච්චුනාම ඔබට මේ තරම් වේදනාවක් දැනුනා නං, අපායේ ගිනිදැල් වලින් දැවෙනකොට කොච්චර වේදනාවක් දැනෙයි ද? ඔබව ඒ වේදනාවට පත් කරන්න මට බෑ."
No comments:
Post a Comment